شاب يستغيث من والدة علي فيس بوك بمنشور وفيديو
يظهر به والده يعتدي عليه بالشارع.
قائلآ في المنشور
بـتـمـنـى حـد يـلـحـقـنـي ,, نـفـسـي أعـيـش آمـن
عندي 36 لا عمري شربت سيجارة ولا سرقت ولا سمعتي وحشة وتعليم عالي ومسؤول عن والدتي وشقيقتي بشتغل ب200 جنيه في اليوم عمري ماكنت عاله وبصرف على أكلي وشربي ووالدتي
لكن ربنا إبتلاني بـ أب (ظـالـم ، مـفـتـري ، جـبـار)
أب مليونير كل نشاطه في الحياة إنه بيصحى يوم 1 في الشهر يلم إيجار أكتر من 15 شقة سكنية غير المحلات ويديهم لبناته من زوجته التانية ويمتع نفسه وسجايره وبس
وبعد كده باقي الشهر يدور إزاي يدوس على البشر إللي حواليه إستناداً لفلوسه الكتير ولسنه الكبير
ويتسلى في الأذى وعليا طبعاً بسلطته الأبوية
فوق كل ده أنا ماطلبتش منه أي جنيه ولا محتاج من فلوسه شئ
بقالي سنين مستعوض ربنا في حياتي
ويدوبك عايش أشتغل وأكل وأشرب حتى ماعرفتش أتجوز
وزهدت في إني أنول أي رفاهية من إللي بيتمتع بيها أبويا ومراته وبناته الإتنين من فلوسه الكتير لأنه مليونير
هحكي نبذة بسيطة عن معاناتي أنا وشقيقتي معاه
بعد تطليق والدتي رفض يصرف علينا وكننا أطفال
2009 جابلنا الشرطة وإترمى عفشنا في الشارع وكانت شقيقتي عمرها 13 عام فقط وطردنا من شقته
2013 كهربني بصاعق كهربائي وحبسني في بيته وضربني لغاية ما إضطريت أنط من تالت دور علشان أهرب منه ومن إستقوائه بالشرطة لأنه أب
2015 أرسل بنته الكبيرة تتبلى عليا في محضر إني سرقت منها سلسلة ذهب وجابلي شهر حبس و10000 غرامة لولا رجالة المنطقة وقفوا يتحايلوا عليه وبوست رجله قدامهم وأجبروه يتنازل نظرا لإتطلاعهم على مشاكله معانا على مر الزمن وثقتهم في أخلاقي ومظلوميتي
أذلنا وأذلنا وأذلنا حتى وصل به الحال لأنه أجبر شقيقتي تمضي على ورقه إنها إستلمت منه فلوس جهاز جوازها حتى يوم كتب الكتاب رفض يحضر وأنا إللي جوزت أختي وكنت في ضهرها
عايش علشان يفضحنا ويذللنا ويدوس على كرامتنا
أنا دلوقتي سايبله الحياة بفلوسه بسلطاته بنفوذه وعايش في حالي أنا ووالدتي لكن هو زي مانتوا شايفين في الفيديوهات ضرب وإعتداء هو ومراته وبناته ومصر يرميني في الشارع تاني لمجرد إن الشقة إللي عايش فيها بإسمه ولمجرد إن ال 100 جنيه إللي هدفعها لمحامي هتوجعني أكتر من إنه يرمي قصادها ألاف الجنيهات لمجرد إنه يكسر كرامتي أنا ووالدتي ويأذيني
أول ليالي العشر الأواخر شقيقتي قضيتها في القسم بعد إصراره أن يحرر لنا محاضر كيدية لولا تدخل العقلاء من الشرطة والجيران والأقارب وأخذنا عليه تعهد في محضر رسمي بعدم التعرض
وبعدها بثلاث أيام فقط تروه يكرر إعتدائه عليا وعلى شقيقتي وأمي لمجرد أنه يرانا في الشارع ضارباً بعرض الحائط محضر عدم التعدي السابق
أخيراً بابا مالوش كبير غير أمواله أمواله فقط
ومعايا بيستغل أبوته وسلطات الأب علشان يدوس عليا وعلى كرامتي ويدمرلي حياتي أكتر ماهي بايظة
بفضل من الله وبتربية والدتي يشهد لي الجميع في مدينة الشيخ زايد بالسمعة الحسنة
ويشهد عليه الجميع بمشاجراته وسوء أخلاقه وتصرفاته وإستدامة مشاكله
أعمل إيه علشان أعيش في أمان أشتغل وأكل وأشرب بس
دون خوف من طرد أو تلفيق تهم أو إعتدائات جسدية عليا وعلى أمي وأختي؟!
نفسي أعيش آمن فقط مش في غابة سيدها سيد عبيد والدي
