بقلم السيد عفيفي جمال الدين
(تفتيش فى أوراق منسية)
جدى الكبير ساب وصية فى الورق
اوعى تفرط فى الكرامة ياولد
شد الدراع خليك شجاع زينا
اياك تخاف زى اللى خاف من قبلنا
ولما شاف كرباك خديوى انحنى
اياك تبيع كلمتك لو تنجلد
دا اللى يبيع كلمته بكره يفرط فى البلد
علمنى اخاف يابوى وعلمنى
علمنى اخاف لأن الخوف
بيريح وبتعدى
علمنى ازاى امد لحافى على ادى
علمنى حروف الصمت
انا لا بعرف أأ راها ولا اكتبها
وبالعربى انا امى
ويا امى زمان جيتى وبإيديكى
سكبتى الحب فى دمى
زرعتينى فى الأرض نخلة وصفصافة ولبلابة
وتمتمتى على جذعى
وقلتى الصبر ياولدى
فاكره ياما لما قلتى راح استنى
اشوفك ضل يجمعنا
اشوفك بلحة فى الطين
بيفطر بيها فلاحى
اشوفك زهرة على شجرة بتتدلى
على النيل
وفى الليل. لقيتهم جونى فى الأحلام
صادروا الطرح فى فروعى
ورموا البور فى ضلوعى
ومن لسانى خدوا الكلام
ولما حاولت اتكلم،حكموا
عليا بالإعدام
دثرينى دثرينى
وبين كفوفك احملينى
وبجفونك ضللينى
وبدموعك طهرينى
قالتلى راءيتك من اللى قلته
واتقال عليك
عطيتك راحتى فى الدوخة
سقيتك صبر فى الميه
على جبينك شبة وفسوخة
راح اشيلك يابنى فى عنيه
ختام
انا مش هكون رغم السكون ساكت
ومش هكون رغم الحديد جبان
ولاهبيع الكلمة اللى فى ضميرى
ولابد يوم يا امى راح تجينى
وتلاقينى مارد وراجع ارجع اللى كان
فارد جناحه على الغيطان ضل
وبدفن الاحزان
نايم وصاحى وهنطق الكلمة
هحرس غيطانك من السهم للفدان
هتلقينى يا امى يامصر
رغم الدباب والكلاب انسان
تفتيش فى أوراق منسية
اكتشاف المزيد من جريدة المساء العربي
اشترك للحصول على أحدث التدوينات المرسلة إلى بريدك الإلكتروني.
