رجل الحديد… شغف لا ينتهي داخل الجيم ورحلة بحث عن العالمية
الإسكندرية
حوار: محمد الزناتي
حوار خاص مع لاعب كمال الأجسام والمدرب الشخصي المعتمد محمود مجدي
س: في البداية عرفنا بنفسك وببدايتك مع لعبة كمال الأجسام؟
ج: أنا محمود مجدي من الإسكندرية، موظف في إحدى الشركات، وفي نفس الوقت لاعب كمال أجسام ومدرب شخصي معتمد. بدأت مشواري مع اللعبة بدافع تطوير نفسي وصحتي، ومع الوقت أصبحت جزءًا أساسيًا من حياتي اليومية.
س: بما إنك موظف… إزاي بتقدر تنسّق بين شغلك وتمرينك؟
ج: الموضوع محتاج التزام وتنظيم وقت بس. بحاول أثبّت ميعاد تمريني سواء قبل الشغل أو بعده، ودايمًا بجهز أكلي معايا عشان التزاماتي ما تعطلش أهدافي. لو فيه إرادة… هتلاقي وقت لكل حاجة.
س: أنت حاصل على شهادات في الإسعافات الأولية والتغذية… ده انعكس عليك إزاي كلاعب ومدرب؟
ج: شهادات الإسعافات الأولية مهمة جدًا لأي مدرب، لأنها بتخليني أعرف أتعامل صح مع أي إصابة أو إجهاد يحصل لأي حد بيدرب معايا. أما شهادة التغذية فهي العامل الأهم… لأنها بتساعدني أظبط نظامي الغذائي ونظام المتدربين، وده بيفرق جدًا في شكل الجسم والنتائج.
س: بصفتك مدرب شخصي… إيه الأخطاء اللي بتشوفها كتير عند الشباب في الجيم؟
ج: أكتر خطأ هو حب الاستعجال، وفي ناس بتتمرن غلط وبتتعرض لإصابات بسبب إنهم بيقلدوا فيديوهات على النت. لازم كل واحد يعرف إمكانياته، ويتمرن بخطة صح، ويفهم إن الجسم محتاج وقت عشان يتغير.
س: احكيلنا عن يومك التدريبي؟
ج: يومي بسيط… تمرين واحد أو اتنين حسب وقت الشغل. ببدأ بتسخين كويس، وبعدها تمرين عضلتي الأساسية، واهتمامي كبير بالتمارين المركبة اللي بتبني قوة حقيقية.
س: ما هو نظامك الغذائي الحالي؟
ج: بروتين ثابت من الفراخ والبيض والسمك، وكربوهيدرات محسوبة زي الرز والبطاطا، بخلاف الخضار والمية اللي ما ينفعوش يتشالوا من أي نظام باستخدم مكملات ضرورية بس من مصادر موثوقة وبجرعات آمنة.
س: شايف مستقبل اللعبة في مصر إزاي؟
ج: اللعبة بقت جزء من ثقافة الشباب، وفي وعي كبير بفكرة الصحة والجسم الرياضي. كمان البطولات بقت أكتر، والمدربين بقوا أكثر احترافًا، وده بيدي فرصة لأي حد عايز يوصل.
س : طموحك الجاي؟
ج: هدفي إني أوصل لأبعد نقطة ممكنة في البطولات الدولية، وأرفع اسم بلدي والإسكندرية في أي بطولة أشارك فيها. الحلم موجود… والشغل عليه شغال يوميًا.
س : نصيحة أخيرة لكل اللي بيبدأ طريقه في الجيم؟
ج: الصبر… الالتزام… والاعتماد على العلم مش على الكلام المنتشر. اهتموا بالأكل والنوم، وما تخافوش تبدأوا مهما كانت ظروف الشغل أو الوقت.
رجل الحديد… شغف لا ينتهي داخل الجيم ورحلة بحث عن العالمية
اكتشاف المزيد من جريدة المساء العربي
اشترك للحصول على أحدث التدوينات المرسلة إلى بريدك الإلكتروني.
