مقال × حدوته
مقال × حدوته مراحل نمو الشر في هذا المقال حابب أخرج عن المألوف شوية وأتكلم معاكم عن شيء بيكبر داخل الإنسان بهدوء .. وهو الشر.
مش دايمًا بييجي فجأة، ولا بيتخلق في لحظة حتى لو كانت لحظة غضب.
الشر بيتبني خطوة ورا خطوة من طفل اتظلم أو شاب اتحرم من حضن أو كلمة أو فرصة.
كل شرير في الأصل كان إنسان بسيط .. لكن حصل له شيء كسر فيه حاجة ما اتصلحتش تاني.
المرحلة الأولى: الصمت
أول مراحل بناء الشر بتبدأ بالصمت
لما يتعلم الإنسان يكتم وجعه ويبلع القهر ويسكت عشان ما يتهاجمش أو يتلام.
ومع كل مرة يسكت فيها بيتخزن جواه شحن سلبي
ولما ييجي اليوم اللي يقرر ينطق .. بيخرج كل اللي كتمه دفعة واحدة، بس مش في صورة كلام .. في صورة فعل مؤذي.
المرحلة الثانية: التبرير
بعد الصمت ييجي التبرير.
لما يبدأ الإنسان يلاقي لنفسه أسباب لكل قسوة،
يقول “هما اللي بدأوا”، أو “ما حدش حاسس بيا”،
وبكده يبدأ يحوّل الغضب إلى منطق .. والمنطق إلى سلوك.
وساعتها بيتحوّل الألم من حالة دفاع إلى سلاح هجومي.
المرحلة الثالثة: التحوّل إلى عقيدة
ودي أخطر المراحل.
لما الشر ما يبقاش مجرد تصرف بل قناعة.
يبقى مقتنع إن القسوة هي الحل وإن الانتقام نوع من العدالة.
ساعتها خلاص الإنسان بيبني لنفسه جدار يبعده عن الرحمة ويقنع نفسه إنه الصح .. ويبدأ يشوف الخير ضعف .. والطيبة سذاجة.
الحقيقة
الشر مش وراثة .. الشر صناعة.
وكل مرة بنسكت فيها على ظلم أو بنستهين بوجع غيرنا .. إحنا بنزود طوبة في جدار جديد من جدران الشر.
وفي المقابل كل مرة بنسمع، بنطبطب، أو بنحاول نفهم،
إحنا بنهدّ طوبة من الجدار ده.
الرحمة مش ضعف، دي مقاومة من نوع تاني،
مقاومة ضد الشر اللي ممكن يتسلل جوانا من غير ما نحس.
احذر أن تزرع في داخلك ما تخاف أن تحصده في غيرك .. فالشر يبدأ ببذرة صغيرة في القلب قبل أن يصير غابة في العالم.
واعلم : أن وجدت في محيطك شرير ربما تكون مشترك في نمو الشر داخله.
اكتشاف المزيد من جريدة المساء العربي
اشترك للحصول على أحدث التدوينات المرسلة إلى بريدك الإلكتروني.
