بقلم السيدعفيفي جمال الدين
(وصية أخت لاخوها)
ياخويا يابن أمى وبويا
فى رمضان انا محتاجلك
تعزمنى فى وسط عيالك
و طبطب عليا وتحمينى
دا انت حياتى ونور عيني
أنت كل حاجة بعد موت ابويا
انت إبنى ابويا واخويا
محتاجة لعطفك وحنانك
وتيجى بيتى ومكانك
محتاجة عليا طلتك
متحرمنيش من دخلتك
عليا البيت
دا انا ياخويا بفرح لو عندي فى يوم جيت
ياخويا يابن أمى وبويا
محتاجة ايديك خد تمسح دمعتى
عاوزاك تكون سندى فى سكتى
مش عوزاك ترن بتليفونك
عاوزة اشوفك وأبص فى عيونك
واحس بحضنك الدافى
واسمع دقات قلبك الصافى
وتقولى تعالي ياختي وحشتينى
واسمعها من شفايفك واشوفها بعينى
ألمسها بروحى من نور عيني واخويا
دا انا محتاجة لمسة ايديك
ومحتاجة نظرة من عنيك
تفكرنى بحنية ابويا
عاوزاك تزورنى فى رمضان.
واتشرف بك في المكان
وترفع راسى بين الجيران
ومتحسسنيش إنى تقيلة عليك
دا انا ياخويا بشوفك بفرح بيك
دا انت اخويا ابن أمى وابويا
دا ربنا وصى بصلة الارحام
وقالك افشى السلام
عاوزة اسمع منك حلو الكلام
وتقولى بحبك ياختى يابنت أمى وابويا
وتوعدنى يكون ليا وعد
ان مفيش شىء يفرقنا من بعض
وتكون لحياتي سبب السعد
واحس بيك انك أمى وابويا واخويا
تحياتي لكم
وصية أخت لاخوها
اكتشاف المزيد من جريدة المساء العربي
اشترك للحصول على أحدث التدوينات المرسلة إلى بريدك الإلكتروني.
