جريدة المساء العربي
مقالات مشابهة
الأديب د / عاطف فؤاد بطرس
يا موزع الصبر
صبرك مر
و كأس الضني غالي
و نصيبي من الفرح قليل
كان ناقص ما كفاني
و أنا أصل زمني عنيد
كان قاسي عليه كتير
وجعني و بكاني
يا موزع الصبر صبرك مر
قوم عيد الحساب من تاني
و قوم الفجر
قسم قسمة العدل
و أديني من الفرح
على نصيبي نصيب تاني
خد مني كأس الصبر
و أديني من الفرح
بدل الكأس كأسين تاني
يا موزع الصبر صبرك مر
البخت كان مايل
و الدنيا معنداني
القسمة كانت غلط
و الحق نقوم نوزعه من تاني
أنا شايف إن الفرح
متوزع على الكيف
و نصيبي ما كفاني
مليت جروح الزمن
و الدنيا معنداني
الصبر مني خلص
و هموم الزمن تعباني
خبطت على باب الفرح
قالوا الفرح غايب
ضاع منه عنواني
خبطت على باب النصيب
قالوا النصيب غلاب
ما بيسمع لحد عتاب
و لا بينعاد من تاني
خبطت على باب القدر
قالوا القدر مكتوب
قوم يابني صلي و توب
تلقى الفرح تاني
و أرضى بالمكتوب
كأس الحياة التوبة
و الحسنة مكتوبة
إياك تلوم على الزمن
أو تشتكي تاني
و عجبي
آدم.
413 إجمالي المشاهدات
