داخ دوخ!
“زجل مغربي”
بقلم _ محمد دومو
داخ دوخ!
بلمسايسة غاديين لݣدام
كلمة الفوز هي خير لكلام
ما بقى من غيرها حاضر
عند اللعابة الشداد ولحرار
برق ما تقشع بالفن الرزين
داخ..دوخ..داخوا..
شلا من كلام ݣالو..
السحر بفن للعب حاضر
ماشي ضريب ذاك لحجاب
يا الشامت فق من نعاسك
لمغاربة من طينة نقية
ولاد حرار خدام لبلاد
هاكدة يكونو حق الرجال
ما هي غير مقابلة وحدة
بزهرها دازت البارح
راه اللعب عطات ريحتو
والحاضر يخبر الغايب
أسود الأطلس ماهي غير كنية
تݣالت من زمان
هي كلمة تشبه مليها لملاح
عمر فمك بها وزيد ݣول
هذا عريس مقدم اليوم
هذا سلطان بحكامة يحكم
برى ولباس يا السمعين لكلام
راه المتفائل ما يخاف
ما يدهش ولا يعثر
عيونو حاضية الكاس
زعيم هاذ لعريس ݣالو
مول القاع والباع
حاجتو ديما مقضية
رضات الوليدين حاضرة
علامة ثابثة مرسية
ما تشبه علامات فارغة
الكاس هذا يكون هداية
الكاس الغالي لمحمق الناس
من الذهب الخالص ݣالو
يكون مهدي للغالي ونفيس
يهديوه لمغاربة للمالك
وهدايا لكل ام حنينة غالية
تبوريشة طالعة
زغبها واقف يتفرج
فرحة دايمة سايرة
هنية مني لكل لمغاربة
-بقلم: محمد دومو
-مراكش/ المغرب
اكتشاف المزيد من جريدة المساء العربي
اشترك للحصول على أحدث التدوينات المرسلة إلى بريدك الإلكتروني.
