قصيدة لكل أمهات مصر الاحياء منهم والاموات👇👇
بتدعيلى
….قالولك شاعر الجامعة
ده بفضل ربنا وامه
الاستيدجات مدغدها …..طالع وتد وزى امه
قالولك معشوق البناويت…ترد ب هيئ ده حيلة امه
مفتتح القصيدة غريب
وانا قاصد
قمة عجزكل الشعرا …لو كتبوا عن امهاتهم كلمتين
ولو كتبوا ماكتبوا
سيبقى مشهد الرضعة
واول سقية سائل …لبن امى مخيلتى
سيبقى الشهد من فمها…. واول قبلة ف جبينى
محتفظ بها صورتى
وكل خميس
لما اركب ترام الرمل او اتوبيس
وست كبيرة واقفة ياعينى مش لاقية يادوب كرسى
انط واقوم واقعدها
وادعى يارب يسعدها
واخاف امى تكون زيك ف نفس الوضع
ف اجرى عليها من الخضة
الاقيها بتتوضا
وتتهجد وتدعيلى
واكون راجع لوش الفجر
وهيا كارهة تأخيرى
وتدعيلى
وطيش الشاب لما يزيد
بيقلب عند
ومعروف عنى انى عنيد
واخدانى التوهة والسكة والبنات والشعر
وهيا معليالى السعر فوق
….عند ربى فوق
بسجدتها وتدعيلى
عمرى م انسى وانا صغير
يوم م الابلة ضربتنى
عشان افصل تسكتنى
قالتلى اطلب واتمنى
ك أنك جوة ف الجنة
وكان ساعتها نفسى ف ايه؟
نفسى ف ايه؟
ف التفاح الامريكانى
وكان غالى
وكنا ساعتها اخر الشهر
واخر الشهر جيب مخرومبينزف دم
وف سرها بتقولى اتلم
لكنها…. وفت معايا بوعدها
لكنها ……وفت معايا بوعدها
وداخلة البيت عشان افصل تغنيلى
ورغم اعلانها افلاسها
مع اول قطمة للتفاحة بسنانى ساعتها كانت بتدعيلى
بحسك نجمة تتخفى ف حضن الليل…..
تضمينى عشان بردان
بحسك أية من القرأن
بحسك صوت امام مسجد بيوعظ مسلمين لله
وطول عمرك راضية ياأمى بالقسمة ….
لاطالبة المال لاطالبة الجاه
ولما بنعيا انا واخويا ورغم اننا شحطين
بتبقى لكل حد دواه
وتتحايل على وجعنا عشان يمشى
ياأما الامنا تتألمها قبلينا
ولا تستحمل منى ف مرة قولة اه
قالولك بصى قدامك لاحلامك
فضلتى تزرعى فينا مبخلتيش
قالولك وزعى الطيبة
طمعتى فيها خدتيها موزعتيش
التفاصيل ….ف قصة ام وولادها تطول وتطول
باحسك انتى ياامايا ملاك ورسول
وياويلى… ياويل ويلى
ف البعد عنك
عشان عايشة بتدعيلى
اما بقا اللى امه ماتت
ف ميعتبرهاش ان ماتت
زور قبرها
حسس ع التربة
اقرا لها الفاتحة
وانسى بقا الغربة
ونشف دموعك من الجزور
واوعى تبكى
انتا جاى بس تحكى
عاملة ايه ؟
اخبارك ايه ؟
واحشانى يااما
وتركب هدومك وترجع بقا لبيتها
وبلهفة تجرى لباب اوضتها
وتستازن….. هاتفتحلك
هتلقى ريحة عطرها مالية الحاجات
ف ترصلها دواليبها وتفرش لها الملايات
وتنفض عنكبوت السقف والمرايات
مفيش حد مات
وانزل اعمل صدقة جارية
ماهو كله من خيرها
وف كل عيد ام اشترى ليها الهدية
وحطهلها فوق سريرها
وف رمضان وقت المغرب
لما المدفع يضرب بوم
وعزمت عيلتك ع الفطار حضروا وجم
سيب كرسى فاضى ع السفرة
دة كرسى الام
اوعى حد يلمسه دى من الاداب
وحط صورة من صورها
ولاااوقلك حط شالها
اى حاجة لجل ماتحسش ف لحظة ب الغياب
وسيب تحت مخدتك دايما فلوس
وف كل عيد اسحب بقااا قرشين
دى عيديتك ……سلم وبوس
وعلم مراتك تعمل الكحك الصاجات
وارجع بقاا للزكريات
كنت تتحايل عليها ….
تعمل البسكوت معاها ب الساعات
ياكل واحد حط امه ف دار مسن
انا نفسى قلبك يوم يحن
جزائها بعد م كبرت فيك ب السنين
تساويها ب اللى مخلفوش
قبل النهاردة ماكنت اصدق ان فيه يوم مسلمين
من ربنا مبيخافوش
اجرى ل امك…… خدها يالا تحت باطك
بوس ايديها …..وبوس كعابها
من حقها تتحامى فيك….
ازاى ياابنى ف يوم تسيبها
من حقها تتحامى فيك
تبنى فيك طول السنين
وانتا بسهولة تهد
اللى مالهوش خير ف امه
صدقنى مالهوش خير ف حد
شاعر الجامعه (احمد الرفاعى)
#قصيدة بتدعيلى
قصيدة لكل أمهات مصر الاحياء منهم والاموات
بقلم/الشاعر احمدالرفاعى
اكتشاف المزيد من جريدة المساء العربي
اشترك للحصول على أحدث التدوينات المرسلة إلى بريدك الإلكتروني.
