الشاعر المراكشي محمد دومو
الإحساس معروض ف السوق!
(زجل مغربي)
تفتح السوق والبياعة حاضرين
كلا مشطون ورزين بالتعيار
هذا من جهتو يفرش لمكان
ولاخر يشطب ويرش بلقوام
ويبدأ سوق التنافيق والفوحان
بتنميق السلعة لي بيعها كلام
الكل دارس صاحبو مزيان
جار البياع يتغير فطبيعتو
ويصبح مغير وكيحسن لفعال
صنانر الصيد كلها ترمات
والطعم لي بارز ال بيع..
تغليط وكذوب وتنافيق..
يدوخ الشاري الحاير..
ويختار ف السلعة مزيان..
تلقاه مبهوض يحقق فلوجوه.
راه البيع والشرى صنعة..
ما تبور يا سامع لكلام ..
ولا تقدام يا فلان..
محكومة بالمعقول..
ومحبوكة بشلا تفنان..
تدرݣ العيب عل الشاري.
لا يتسوخر اللور..
من العيب البارز لي كيبان.
يا الشاري..
يا ذاك الهايم..
يا لي داخل هذا السوق..
نسى عليك خدعة لوجوه..
وعير السلعة بالعين والذوق..
وياك تحسب الناس ݣنس واحد.
راه تتغير وتتبذل وتتحايل..
على حساب السلعة والسوق.
كلشي صبح يتشرى ويتباع.
مشى المعقول وتفضح لكلام.
راهم ݣالو ناس زمان.
لي ما يتباع ويتشرى حرام.
تخلطات لعجينة بلعجين..
حتى ما تقدر تفرز..
من بنة القمح لمليح
ولا من ندغة الشعير..
الإحساس معروض ف السوق!
اكتشاف المزيد من جريدة المساء العربي
اشترك للحصول على أحدث التدوينات المرسلة إلى بريدك الإلكتروني.
