أخطاء شائعة في الدايت بتأخّر نزول الوزن. كيفيه تجنبها؟
بقلم: د. أميرة العزبي
في ناس كتير بيبدأوا دايت بحماس، لكن بعد فترة يلاحظوا إن الوزن ثابت أو النزول بقى بطيء جدًا. وده غالبًا بسبب شوية أخطاء بسيطة بنقع فيها من غير ما ناخد بالنا. تعالوا نراجع أهمها:
⸻
١. الاعتماد على السعرات فقط من غير جودة الأكل وهنا حتي لو نزلنا في الوزن فشكل الجسم هيكون المشكله
ممكن تكون بتاكل في حدود السعرات المطلوبة، بس مصدرها سكريات ونشويات مصنّعة.
الحل: لازم الأكل يكون متوازن وغني بالمغذيات:
• بروتين عالي الجودة
• دهون صحية
• خضار
• كربوهيدرات معقدة
⸻
٢. عدم كفاية البروتين
البروتين بيقلل الإحساس بالجوع وبيحافظ على الكتلة العضلية.
الحل: خلي فيه مصدر بروتين في كل وجبة، ولو عندنا خطه غذائيه الافضل نتابع مع متخصص يحدد بنا احتياجات جسمنا
البروتين مثل :
• البيض
• الزبادي
• الفراخ
• التونة
⸻
٣. الأكل من غير وعي
“اللقيمات المتكرره الصغيرة “طول اليوم بتزوّد السعرات من غير ما نحس.
الحل:
• سجّلي كل حاجة بتتاكل
• ابعدي عن الأكل وقت التوتر أو الملل
• كلي بتركيز، مش قدام التلفزيون أو الموبايل
⸻
٤. قلة شرب الميّه
الميّه ضرورية لعمليات الأيض، الهضم، والشعور بالشبع.
الحل: اشربي من ٢.٥ إلى ٣ لتر ميه يوميًا، وكمية أكتر في الصيف أو مع الرياضة.
⸻
٥. النوم المضطرب أو القليل
قلة النوم بتلخبط الهرمونات
الحل:
• نظمي نومك ٧–٨ ساعات يوميًا
• قللي استخدام الموبايل قبل النوم
• خدي وقت للاسترخاء قبل ما تنامي
⸻
٦. الميزان هو المقياس الوحيد
الوزن لوحده مش كفاية، ممكن تنزلي دهون وتكسبي عضل، وساعتها الميزان يفضل ثابت.
الحل: تابعي:
• شكل الجسم في اللبس
• مقاسات الجسم
• إحساسك بالخفة والطاقة
⸻
الخلاصة:
الدايت مش حرمان، هو أسلوب حياة.
ركزي على التغذية الصح، كوني صبورة، واكتسبي عادات صغيره واستمري عليها وهنا المكسب للننا بنغير العادات
دمتم اصحاء
د.أميره العزبي
اكتشاف المزيد من جريدة المساء العربي
اشترك للحصول على أحدث التدوينات المرسلة إلى بريدك الإلكتروني.
