مش هصدق
عن الدنيا
بقلمي جمال القاضي
مش هصدق
عن الدنيا
مش هصدق ضحكه منك
لأن عارف مع كل ضحكه
فيلم وكله أكشن بالنهاية
فيه كل مشهد زي قبله
فيه سيناريو محبوك لدورك
والأصل فيه غش وخداع
مش هصدق دمعه سالت
من عيونك لأني عارفك
لكل دور كنت إنت بارعه فيه
ولكل لون من ألوان وجوهك
له معاك منه ألف لون ولون
ولكل دور شايله له مليون قناع
مش هصدق شحوب عيونك
أو لما تبكي وأشوف دموعك
وتيجي تجري ويكون ظنونك
أنسى منك أي قسوة أو حزن كان
ويكون رجاك إني اسامحك
لأن عارفك ف يوم هتمشي
وفجأة يحصل ومن غير وداع
ومن غير سلام يكون رحيلك
مش هصدق مرة تانية فيها جايه
وشايله ليا مابين إيديك
كتير ورود وكتير هدايا
وتقولي خدها مني هدية ليك
مش هصدق لأن طبعك شوفته دايما
لأي لقمة واخدها مني وم الجياع
وال عارفك أكيد يقول عليك
دا دنيا وال فيها لو أمنت له
ووثقت أنه ف يوم هيبقى
يبقى بإيديه كاتب نهاية للحياة
بداية سطورها عنوان لحكمة
في الدنيا لكل واثق ولكل طامع
مهما فيها يرمي ببذور أماني
أو ف يوم لضيقها شافه اتساع
يبقى خاسر ومايكون حصاده
غير غضيض ثمار واحساس ضياع
مش هصدق
عن الدنيا
اكتشاف المزيد من جريدة المساء العربي
اشترك للحصول على أحدث التدوينات المرسلة إلى بريدك الإلكتروني.
