حاوِل
كلمات محمد السيد علي
حاوِل
حاوِل يلَّا وحقق حِلمك
إقرا وإدرس وزوِّد عِلمك
إنتَ لوحدك هتشيل همَّك
ومعاك بس أبوك أو أمك
ويمكن أخوك علشان من دمك
قلبه يحن عليك ويحبك
ويتمنالك يسْطَع نجمك
غير دول أنا مقدرش أقولك
حد تهمه أو هيهمك
بس انت اتمسك بطموحك
أوعى اليأس يهوِّب لمَّك
أوعى حد يقولك إنسى
أوعى حد يكسِّر عزمك
خلى تُكَالك كدا على المولى
قوله يا رب اكرمنى بكرمك
قوله يا رب قوى عزيمتى
وزدنى يا رب كمان من نِعمك
أوعاك يوم تستسلم أبداً
مهما الشيطان حاول هدمك
مهما يحاول يوم إقناعك
إنك ترجع تكسر سهمك
أعوان إبليس حواليك ياما
يفرحوا بس فى حزنك وغمَّك
يفرحوا جداً لو يوم تفشل
يفرحوا بس فى شتمك وذمك
لازم تبقى منهم أقوى
وتثبت إنك ولا شئ همَّك
بس انت ابذل كل جهودك
حاول ترفع للعُلَا إسمك
خَلِّى حلمك قدام عينك
أوعى حد يسرقه منك
أوعى حد يشدك ترجع
أوعى حد يغير فِهمك
إنت لوحدك تقدر تبنى
بُرجك عالى وترفع قِمَمَك
إنت لوحدك تقدر تصمد
قدام زمنك لو يوم ظلمك
قدام ظلم العالم كله
لو يوم كل العالم هاجمك
أوعاك أبداً يوم تتنازل
أوعى تغير أبداً قيَمك
إتمسك دايماً بمبادئك
أوعى تحس انك زى عدمك
خلى العالم يعرف قيمتك
والدنيا كلها تحترمك
إتحدى العالم بطموحك
واصبر على جرحك لو ألمك
صدقنى الأحزان هتعدى
وهتوصل وهترفع عَلَمَك
وهتسجد للمولى وتبكى
وتقول له شكراً على كرمك
===============
حاوِل
