جريدة المساء العربي جريدة المساء العربي
مرات الأخ الكبير
بقلم /خالد عيسى القناوي.
مرات الأخ الكبير
بتاريخ 10/29 /2023 يوم الاحد
انا النهارده مش هتكلم عن الاخ الكبير لا لا لا لا
أنا هتكلم عن( مرات الأخ الكبير)
وبعدين يعني هو الأخ الكبير مش هيسلم من أي حد.
في كل لحظه يقولك أصل إنت الكبير، في كل مش مشكله يقولك أصل إنت الكبير..
إجلس كده براحتك واطلب قهوتك المفضله علشان جلسة النطق بالحكم قريبه وهيا بنا……
أولاً…. ماذا تعني كلمة الكبير
كلمة الكبير تعني الشيء الكبير في الحجم والصفه والعمر والمَقام وغيره…
ولقد جعل الله أشياء كبيره، وجعل أشياء أكبر منها
فلقد حث الله الناس على العمل والجهد وجعل العمل شيئاً كبيراً و امر المسلمين عندما يسمعون كلمة( الله اكبر)
أن يتركوا الشيء الكبير الذي في أيديهم إلى ما هو أكبر وهو الصلاه والوقوف أمام رب العالمين.
إيه العلاقه؟
*لا تتعجل صديقي القارئ أريد أن أثبت لك أن هناك أشياء كبيره ولكن هناك أشياء أكبر منها بكثير ونحن هنا للحديث عن مرات الأخ الكبير.
*فلا تخلو عائله من وجود مرات الأخ الكبير ومن المؤكد أنها تحمل على عاتقها أموراً كثيره، بل ولربما تتحمل أكثر ما يتحملهُ زوجها الذي بمجرد أن دخلت بيتهُ جعلها زوجة الأخ الكبير لذا فهي يجب عليها الأتي….
* البحث وراء كل مشاكل البيت وحلّها وتحسين علاقه زوجها مع اهلهُ علشان مفيش حد يقول ده أخذته من أهله. *البحث وحل مشاكل إخواته البنات وتلبية كل متطلباتهم إن كُن يسكُن بجوارهم.
* تحمّل اخواته الذكور الذين لم يتزوجوا بعد.
*الذهاب إلى المستشفيات واقسام البوليس وراء أهله الذين حالفهم الحظ وحلوا ضيوف في هذه الأماكن.
* تحمّل أم زوجها التي تدخل عليها غرفتها أثناء نومها بُحجه أنها مرات الكبير!!
__أيها الساده إن زوجة الأخ الكبير تنعى حظها في كل يوم على أن جعلها الله زوجة للكبير.
وإليكم ما حدث مع السيده / حكايه
وشهرتها (مرات الكبير)
__ نحن الأن نجلس داخل المحكمه
القاضي…. نادي على القضيه.
الحاجب…. القضيه رقم واحد لسنه 2023 بإسم السيده حكايه وشهرتها مرات الكبير.
القاضي…..مرات الكبير.
مرات الكبير…. أنا هُنا يا بيه.
القاضي…. السيد وكيل النيابه.
وكيل النيابه….. سيدي القاضي حضرات المستشارين
نحن أمام قضيه عامه تسببت في هزه أرضيه قويه بمقياس العدل والحق.
هذه الهزه الأرضيه جعلت الناس ينتبهون لإمورٍ كانوا لا يعرفون عنها إلا أنها حقاً اصيلاً لهم وواجب على غيرهم.
فإن السيده/ حكايه الشهيره بمرات الكبير
ضربت لنا اروع الأمثله في البيان ولكنها استخدمت طريقة غير مشروعه لذلك فلقد تحملت الكثير من المتاعب منذ ان تم زواجها، فلقد وضعت قائمه بأسماء كل من كانوا يتسببون لها بمشاكل في حياتها اليوميه وقامت بإستدعائهم في الشقة محل الجريمه، وقبل مجيئهم قد إحتالت بفعل توصيلة كهربائيّه داخل الشقه بحيث تشتعل النيران فقط عندما يتم الضغط على زر مفتاح الإناره المتواجد خلف باب الشقه.
وذلك بما جاء على لسانها وأيضاً هذا ما أثبتتهُ التحقيقات.
__ سيدي القاضي لقد تحملت هذه السيده الكثير المتاعب وان ما ذكرتهُ أمامكم هو جزء صغير جداً مما حدث لها.
فإن هناك أمور أخلاقيه لا نستطيع ذكرها أمام هيئة المحكمه الموقره، وأيضاً حسب طلب المُتهمه.
__سيدي القاضي إن ما فعلته هذه السيده هو جريمه شنعاء تستحق عليها الإعدام أكثر من مره.
__سيدي القاضي أنا أطلب لهذه السيده أقصى درجات العقوبه، كما اطلب من عدالتكم ايضاً النظر بعين الرحمه والشفقه في هذه المسكينه لما رأتهُ في حياتها.
القاضي…. الست حكايه مرات الكبير هل فعلتي ما نُسب إليكي؟
مرات الكبير….. يا بيه أنا بشكرك وبشكر سعاده الوكيل إنه يعني لسه ما أمرش بإعدامي لحد دلوقتي علشان احكي كل اللي حصل، احكي يا بيه؟
القاضي…. إحكي.
مرات الكبير…. أنا يا بيه كنت كبيرة إخواتي وأبويا كان بيعتمد عليا في كل حاجه وكنت بشوف إخواتي بيلعبوا ويتمتعو بكل حاجه، وأنا مينفعش أعمل زيهم علشان أنا الكبيره.
القاضي….. أمك عايشه ولا ماتت؟
مرات الكبير….. ما تستنى بجى، امي ماتت من زمان وابويا كان عاوز يتجوز بس إخواتي مرضيوش قالو له لو إتجوزت مش هنقعد معاك هنا في البيت….
على العموم أنا أول ما جالي العريس قلت الحمد لله كده أنا بقى خلاص هرتاح من اللي أنا فيه بس يا بيه أتاري أهل جوزي لما جُم يختارو كانو بيقولو إن البنت دي كبيرة أبوها وبتاعه شقه، وهي دي اللي هتنفع إبننا!!!
بس أنا يا سياده القاضي عاوزه أسألهم في حاجه هما قالو هتنفع إبننا صح…
أهم كلهم جالسين أمامك، أهم أسألهم يا بيه صح ولا لا
__لم يتكلم القاضي وأشار بيدهِ لهم بالجواب
ما تبقى من أهل الزوج…… نعم قلنا هكذا.
مرات الكبير….. طيب عملتو فيا كده ليه؟
يا بيه دا كانوا بيخلوني أروح أشتري لكل واحد العيش من الفرن، أنا اللي بجيب حاجات رمضان، وأنا اللي بشتري حاجات العيد، وأنا اللي بشتري حاجات المدارس، وأنا اللي بدفع فاتوره الكهرباء والمياه والنت والغاز، وأنا المتحدث الرسمي بإسم العائله.
وبعد كده يا بيه لما يكون في فرح بيخرجوا كلهم ويسيبوني في البيت علشان أخلي بالي من البيت لما يرجعوا، ولما يروحوا المصيف بيخلوني أجلس في البيت علشان أخلي بالي.
حتى لو رحت معاهم يا بيه كنت بقعد على الشط علشان أخلي بالي من الهدوم، حتى عيالي يا بيه كان لازم يقعدوا في المكان اللي انا قاعده فيه يعني مش بس ظالمني ده كانوا ظالمين عيالي كمان يا بيه.
يا بيه دا أنا( كنت بنسى أني واحده ست)
جالي أخبار إن زوجي عارف نسوان كتيره ولما جيت اتكلم أكثر الناس اللي هم بيبهدلوتي قالوا إنتي السبب إنتي مش مدياه حقه خالص فلازم يعمل كده!!!
يا بيه أنا مكنتش عارفه احكي لمين، مش عارفه اتكلم مع مين علشان كده قلت ما فيش حد هيسمعني إلا وأنا واقفه في قفص الإتهام وهما بيعرفوا مني اللي حصل.
لو كان في حد سمعنى كنت ممكن اهدى شويه أو حتى كنت ممكن اغير من وضعي.
**أنا الصراحه قلت أنا مش هعمل زي باقي ناس واروح انتحر، كل المنتحرين بينتحروا بسبب ناس تانيه أنا قلت لا أنا اللى هموّت الناس التانيه دي، وأنا اللي هعيش
«أنا كده غلطانه يا سياده القاضي»
القاضي…. فيه حاجه تانيه عاوزه تقوليها يا مرات الكبير؟ مرات الكبير….. آه يا بيه عاوزه أتكلم
القاضي….. إتكلمي
مرات الكبير….
* هما ليه الناس بتتغط على اللي مش بيتكلم، ومش عارفين إن ممكن يجي يوم واللي مش بيتكلم ينفجر؟
* هما ليه الناس مش بتحس بقيمة اللي فى إيديها واللي معاها إلا لما تزوول من وجهُهم؟
*هما الناس ليه فاكره إن المحترم والمؤدب واجب عليه إن يظل كده طوال حياته، ومش مسموح له بأن يتكلم خالص ولو في يوم قال آه الكل بيكون ضدهُ؟
«يا بيه لو كانت دى ضريبة الإحترام والأدب فأنا ندمانه على كل لحظه كنت فيها مُحترمه ومؤدبه»
إنتهت الجلسه وتم الحكم على السيده /حكايه
الشهيره بمرات الكبير.
*فهل من رايكم إيه هو الحكم
« الإعدام أم البراءه»
مقال /مرات الكبير
مرات الأخ الكبير
1,415 إجمالي المشاهدات
