جريدة المساء العربي جريدة المساء العربي
قمر ١٤
شعر / محمود فتحي
متكلمنيش عن قمر ١٤
قمر ١٤
لإني عارفه
ضحكة وفرحه وحزنه ..
ماأنا اصلا معاشره
همسه وحسه ولمسه
ما كنت عايشه
وقلبي الممسي .. زاده وملحه
وقلبك الرحال .. محتال
غربة مواجعه
كل هواكي اللي جواكي مفارقه
حتى قصاقيصك الورق
هي في الأصل .. آخر فصل
ماسك مفاصله
في شخبطات عشقه
ماشي على بطنه
بالرغم ..
تلاقيني بحاول أسابقه
لما ورق الشحر يعكس حزنه
يبقى ع الوشوش ملامحه
كل مطر سفر حاضن مغاربه
و العشق محن .. كهف الحزن
تلاقيني داخله
وليلك المحتوى هوا
أقسا و ماسك مفاصله
باصص على قمر ١٤
لكنه مش شايفه
والناي سكوته غنا
سامع حكايته..
قربي اكتر
وأقري اللي على جبيني
حنيني .. سنيني
مش كل عشق يتحس
ومش كل همس عايشه
ومش كل ضوء قمر
انا شايفه
ومش كل لمسة وجع
وتر مجارحه
دا لأن كل ليل في قمر ١٤
اصلا كان ناوي يفارقه
أصل الليالي منها اللي عاشقه
وفيها اللي واجعه
وفيها اللي مش فاهمه
وليها اللي مكنش عاوز يواجهه
ودا طبيعي لان كل الوجع
جذع … معشوقات بعضه
والحلم حبات ملح
مبدوره في جرحه
أخر كلام قمر ١٤
سؤال ؟
يقولي مش فاكره
والغربة كبوه
ولما يكتمل قمرك
ألاقيني مش واحشه
وماهو كل قمر ١٤
راسم مناظره
فارش على وش الشجر
الوان عشقه وحلمه وجرحه
عيني في عينه
لاقيتني مش شايفه
وقتها …
حلمها …
عشقها …
تشوفه مفارقه
قمر ١٤
2,722 إجمالي المشاهدات
