د/ ندى المرشدى
أنت مين !؟فى حالات غضبك أو حالات فرحك ..
أنت مين !؟فى حماسك وفى ضعفك فى احتياجاك لمشاعر ما ..
أنت مين !؟فى حالات حبك أذاي بتحب أذاي بتتحب ..
أنت مين !؟فى أحساسك بالظلم أو ظلمك للأخر ..
أنت مين !؟فى أحساسك بالخذلان أو خيبة أمل حد فيك ..
سألت نفسك قبل كده (أنت مين!؟)عمرك خرجت برا أسمك والقابك أو منصبك رجعت قبل كده لمرايتك شوفت نفسك فيها حاولت تبص في عنيك وتدخل جوه نفسك وتكتشف أنت تطلع مين !؟
تدور على الأنسان آلي جواك لسه موجود ولا ضاع !فكرت كام مرة أتغلب عليك أسم وظيفتك دكتور ولا مهندس ولا ظابط ولا محامي ولا بواب !؟
طب كم مرة كنت فيها أنسان مع نفسك قبل غيرك !؟
ياتري أتفرجت على نفسك وأنت بتظلم ولا بتستنزف حد سواء في المشاعر أو التفاعل الأجتماعي !؟
طب بررت ظلمك لغيرك كم مرة!؟ بررت كدبك كام مرة !؟
أكيد حسيت بالظلم ودموعك نزلت من الحسرة.. بس أخترت تقف تبكي وتكمل في دور الضحية ولا تمسح دموعك وتكمل طريقك ..وياتري لما كملت أتعلمت أيه ؟!ولاااا أتحولت!!!…… أيوه اتحولت ….نقطة بقا ومن أول السطر وتعالي اقولك أنت مين !؟
أنت مظلوم.. بس فكر بقا هتقضي عمرك كله تبكي وتشكي للرايح والي جي وضيع عمرك .ولا هتبقي انت ظالم وبردو عمرك هيضيع .
أنت أتخذلت .بس هتفضل كده قاعد على جنب وتبكي على اللبن المسكوب ولا هتنتقم بقا ولا حكايتك ايه ..
أنت ضعفت ..بس أختار تكمل وتفضل طول عمرك محبوس في قضبان ضعفك ولا تتغلب عليه وتكسر القضبان ..
أنت متحمس ..بس كملت في حماسك ولا أتهديت ..وياتري أيه هدك ..
بتعرف تفرح !؟ طب أذاي وبتعمل أي
أنت استخدمت منصبك ..بس رجعت لنفسك ولا لبست عباية (فرعون)..
عارف أنت مين !…أنت بشر …. ولازم تغلط بس عشان تتعلم.. لازم تتوجع بس عشان تكون حكيم مش عشان توجع ..كل البشر جواهم الخير والشر القوة والضعف كل واحد فينا ظلم وأتظلم سامح وأنتقم حب وكره عاش حزن وعاش فرح عاش نجاح وعاش فشل. ربنا سبحانه وتعالى خلق فيك كل المشاعر وميزك بصفات الأنسانية ..بس سخرلك عقلك وأمرك بتأمل ..وقبل ما تتأمل الي حواليك تأمل نفسك بتكون أذاي في كل المشاعر دي … مثلاً.أحساس الظلم صحيح مؤلم جداً بس بتعمل ايه بتقف!؟ ولا بتكمل طريقك !؟بتسامح ولا ممكن تربي جواك رغبة الأنتقام من أي حد يقابلك صحيح سعات بنحس بالشر وكل واحد له شره في الي يقتل وفي الي يشوه سمعه وفي الي فاكر نفسة ضعيف ويقول أنا هدعي علي فولان وشايف أن ده ابسط حقوقه وفي الي يستني مصيبة تحصل لفولان ويفرح ويقول أصل ده حقي ..
طب يا أنسان يا جميل انت يالي فاكر نفسك صاحب حق هو أنت مين عشان تحاسب وتقول حقك وحق غيرك أنت مين عشان تحكم عليه بالموت أو المرض أو أي ابتلاء (أنت بشر… أنسان وبس ..مش أله )
صحيح ربنا ميزك وفضلك عن باقي خلقة بس في الأخر هيحاسب الكل هيحاسبك على نيتك وافعالك ووقتك وأفكارك ورغباتك …
أتأمل ذاتك فكر في نفسك بعد أي ظلم أو خذلان أو ضعف عشته ..متفكرش مين السبب وليه ..ولا حتي تفكر ربنا عمل كده ليه ..حقك تزعل وتتألم وخد وقتك وأدي مشاعرك حقها بس متتدهاش عمرك ..
قوم وكمل وأحمد ربنا .وأستخدم ألمك في تقويم ذاتك ..
حاول تخرج برا نفسك حاسبها بس بدون لوم..
قومها بس بدون جلد..
حبها بس بدون أنانية..
خاف بس بدون ضغط ..
(تأمل كُل ما يحدُث حُولك.فلا شئ يحدُث صُدفة .فأنت وَحدك من تستطَيع رسم الطَريق.أستخدم متَاعبك لإصلاح ذَتك بدلاً من أن تَجلس باكياً بجَانب الجِدار . ألتقت أنفَاسك بعد المُعاناة ثم أنطلق من جديد …
أذا كنت لا تمتلك لِجام جوادك بقوة فلا تستحق أن تكون فَارس تَلك الحياة)
