جريدة المساء العربي جريدة المساء العربي
غير جاني لكلام!
بقلم. محمد دومو
غير جاني لكلام!
(زجل مغربي)
غير دلح فيوم خيالي
غفلني وجاني لكلام
اصبحت فاللحظة داوي
نسبح فلعلالي بالتمام
ݣالو مجدوب!!
ݣالو هبيل!!
ݣالو هذا مسكون..
ݣالو هذا غير هداوي!
الصدق ف لكلام قاسح ليوم
تترك بيناتنا فلوساط
واصبح غريب ومضيوم
كلشي دايخ ورجع مفتون
رحلو ناس زمان وفناو
تحث التراب صبحو نيام
ما يصلح كلامي فهاذ الزمان
ولا اصبح يليق يتݣال
البوح خارج من لداخل صادق
جمر ݣادي يكوي بلعوافي
والݣلب مألم ومتضايق
نتعذب وساير نحكي
مهووس بالنظيم عاود ثاني
اصبحت غريب بين ناسي
غادي تايه ومواصل الطريق
والهم لكثير مطير نعاسي
دموع عيني تبكي حروف
منظومة قصايد باكية وتنوح
كلامي قاسح عليا
قبل من لاخر
واك واااك عل لعذاب لمعاود
واك واااك عل الحظ لمسوخر
حرت كثير مع القيل و القال
وما بقى ليا بينهم ما يتݣال
نسول لمجاديب والصحاب
سؤال ما لقيت ليه جواب
واش لكلام يسحر لعقل؟!
واش صاحب البوح مسكون؟!
تلف ليا حساب
ݣولو لي نسيتو ما يتݣال
ݣولو ما بغيتو وبلا تخمام
واك واااك من هاذ لعذاب
صابني ف الدنيا من دون لعباد
أنا غير داوي وغادي
وطالب السماحة وراغب
كل سامع كلامي الشادي
راه لي فيا ما كفاني
هكذا عايش بين لخوت حالي
هكذا مع لكلام لي جاني
هكذا نصارع الهم لي بكاني
غير جاني لكلام!
650 إجمالي المشاهدات
