جريدة المساء العربي جريدة المساء العربي
يا عم يا بتاع الغرابيل
عايز منك غربال أهز كل اللي في حياتي وأعيش مرتاح البال..
وأشوف مين ناكر الجميل واللي في الشده صان
الناس بقت بوشين واللي فاكره دهب طلع نخال
السنين ورتنا كتير والناس بقت الوان
يا عم يا بتاع الغرابيل قولي غربالك بكام
عم يا بتاع الحاجات القديمة شوفلنا حاجه عندك ليه قيمة
شوف قلوب تكون سليمة .. شوف ناس تكون رحيمة
تعبنا م الناس اللئيمة اللي عايشة بألف وش
واللي كل حياتها غش .. واللي أبوها جنيه وقرش
شوف ضحكة م القلب طالعة شوف شمعة في الضلمه ولعة
شوفلنا حتى ضحكة حلوة. سمعنا حتى أي غنوة
تصحي في النفس الحنين ..وتفرح القلب الحزين
يا بتاع الحاجات القديمة .. شوفلنا ناس من بتوع زمان
ناس كانت طيبة ..ناس كانت قريبة
ناس كانت عيشتها كريمة ..ناس كانت عيشتها بسيطة .
يا عم يابتاع الحاجات القديمه ينفع تاخد الناس الجديدة
وترجع لنا الناس باخلاقها القديمة
ثروت وهبه
1,665 إجمالي المشاهدات
