جريدة المساء العربي جريدة المساء العربي
مقالات مشابهة
الكابتن محمود عز رئيس قطاع الناشئين بنادي الاتحاد السكندري يفتح قلبهُ للمساء العربي
حوار /محمد عبد القادر
انتظروا نجم قادم بسرعة الصاروخ…
رسالة هامة لجمهور الاتحاد السكندري.
قطاع الناشئين بنادي الاتحاد السكندري شهد طفرة غير مسبوقة منذ عامان بعد تولي كابتن إمام محمدين منصب رئيس قطاع الناشئين وبالفعل حصد القطاع ولأول مرة في تاريخ النادي بطولة دوري الجمهورية مواليد 2005 عام 2022 وحصد ايضاً جوائز فردية لأحسن حارس مرمي علي مستوي الجمهورية وأفضل مهاجم والهداف
وأفضل بلاي ميكر علي مستوي الجمهورية ثم رحل الكابتن إمام محمدين عن منصبه وتولي هذا العام الكابتن محمود عز منصب رئيس قطاع الناشئين خلفآ له
ولقدحرصت (المساء العربي) على الالتقاء بمحمود عز عقب توليه المهمة رسميًا لمعرفة أهدافه وطموحه مع القطاع والإفصاح عن التغيرات التى قام بها على الأجهزة الفنية للفرق وتوضيح كيفية إدارة الأختبارات وجاء نص الحوار كالتالي:
في البداية أسرة المساء العربي بتبارك لحضرتك وبتتمنالك التوفيق في مهمتك
ربنا يبارك فيكم شرفتوني واتمني اللقاء يكون مثمر ويوصل رسالة إيجابية لجمهور سيد البلد
ايه اخر اخبار اختبارات قطاع الناشئين هذا العام وما خطة حضرتك في الإرتقاء بالقطاع
احنا بدأنا الاختبارات هذا العام علي شقين
الشق الأول بدأ علي ثلاث مراحل
المرحلة الأولي بدأنا من 6/1 حتي 6/21 والمرحلة الثانية بعد عيد الأضحى من 7/3 حتي 7/7 والمرحلة الثالثة هيا مرحلة المقارنة بمعني
الناجحين في الاختبارات من المرحلة الاولي والثانية داخل اسكندرية.
وخارج اسكندرية بياخد كل واحد درجة تقييم وبعد كده بيخشوا علي المرحلة الأخيرة وهيا المقارنة مع فريق النادي في السن الخاص به ويتقارن مع اللاعبين واللي قريب من المستوي الخاص بفريق النادي او أفضل منهم بيتم التعاقد معاه
الشق الثاني خاص بشكل الاختبارات احنا كل عام بيتم الدفع باللاعبين في تقسيمة لمدة من 10 دقائق إلي 15 دقيقة فاللاعب مبيلحقش يطلع اللي عنده او يقدر يتغلب علي الرهبة بتاعت الاختبارات وبدون إحماء وينزل يلعب وخلاص
هذا العام سيتم إعطاء كل 10 مختبرين مدة ربع ساعة يتم فيها إخراج مهاراتهم مع بعض ويخدوا علي بعض وياخد كل واحد منهم درجة وبعد ذلك يتم إدخالهم تقسيمة لمدة ربع ساعة اخري تكون الرهبة خلصت منهم وبدأوا يتأقلموا علي بعض وإخراج أفضل مالديهم ثم يتم الانتقاء منهم الحاصل علي اعلي الدرجات
ما رأي حضرتك في بيع بعض فرق قطاعات الناشئين في بعض الأندية وهل يصلح هذا الأمر مع الأندية الجماهيرية؟
لا طبعاً مينفعش خالص هوا اللي بيبيع ده رايح في إتجاه ايه؟ الأستثمار صح كده طب منا استثمر للنادي بتاعي واعمل قطاع موازي للفرق بتاعتي يبقي تحت عيني وتحت ملاحظتي ولعل وعسي يخرج منهم حد كويس ينضم مع الفريق الاساسي للسن بتاعه ليه بقي
اللي بيشتري بفلوسه ده بيطلب من اللاعبين مبالغ مالية لتعويض امواله اللي دافعها ويلعب بأسم النادي ويخرج يلعب ويخسر بالستة والسابعة والتسعة وكل ده بأسم النادي
مين اللي بيخسر كده؟ أكيد أسم النادي طب ليه انا اعمل كده
امتي نشوف نادي الاتحاد السكندري بيلعب فيه معظم الاعبين من داخل اسكندرية؟
ده استحالة يحصل في ظل الاحتراف القائم حاليآ ممكن كان يحصل زمان في السبعينات والثمانينات عندما كان الفريق يتكون من 80% من لاعبين من داخل اسكندرية او الاقاليم حولها
لكن بعد كأس العالم سنة 1990 ودخول الإحتراف مصر بقي صعب تطبق حاجة زي كده او تسيطر علي الوضع
طب عايزين نعرف طموح حضرتك في قطاع الناشئين يعني ممكن نشوفوا لاعبين بجودة مروان عطية في الفريق الأول؟
وأفضل كمان لسبب واحد إننا الآن بنعتمد اعتماد كلي علي جودة اللاعب فقط لاغير يعني هل يصلح إنه يمثل نادي كبير زي نادي الاتحاد ولا لأ
حتة أنه ياخد بطولة مش أساسي عندي اكتر من إنه يبقي جودته كلاعب تصلح للعب داخل النادي
بمعني إن فريق 2005 وفريق 2007 هما اللي حعتمد عليهم في تدعيم الفريق الأول بكذا لاعب خلال السنتين القادمين انا خلاص 2003 انا خدت منهم اللي انا عايزه واتصعد منهم محمد فارس
وصعدت من 2005 عموري وهناك موهبة قادمة بسرعة الصاروخ موهبة حتعمل رد فعل كبير في النادي وهي أحمد عاطف أفضل صانع ألعاب في دوري الجمهورية 2005
فريق 2005 الحائز علي دوري الجمهورية فيه سبعة لاعبين يستحقون الصعود للفريق الأول وهم
المنشاوي أفضل حارس مرمي في مصر في 2005
عموري أفضل مهاجم في مصر 2005
شرقاوي سرد باك النادي القادم
عبد الرحمن دفندر النادي القادم
مؤمن باك لفت النادي القادم
واحمد عاطف أفضل صانع ألعاب في مصر الموهبة القادمة لمنتخب مصر
اللاعيبة دي انا جايبلهم مدرب محترم وهو (كرم مرسي) اللاعيبة دي عالاقل اتنين منهم في الفريق الأول الموسم القادم والسنة اللي بعدها حجوّد من 2007 و 2008 وادخل ب 2009 قطاعات والسنة اللي بعديها ادخل بيها جمهورية يبقي انا عندي 2005 و2007 و2009 جمهورية كده لمدة 5 سنوات قادمة وموجودين أفضل براعم في مصر عندك في القطاع وكمان حنمشي منهم اللي مستواه بيقل
عايزين حضرتك توجه كلمة لجمهور الاتحاد
طبعاً جمهور الاتحاد هوا الداعم هوا المساند اللي بنتسند عليه
بقولهم إن شاء الله متقلقوش قطاع الناشئين بخير بقي فيه نماذج من مدربين محترمين وبقي فيه كواليتي للمدربين مؤهلات عليا عندها طموح في القطاع
والسنة دي انا عملت حاجة جديدة خالص في القطاع انا غيرت جميع مدربين فرق القطاعات يعني عملت تدوير بينهم يعني اللي ماسك مثلا 2005 حيمسك سن تاني وهكذا
ليه بقي انا عايزه يمسك ورق أبيض من جديد يعني داخل الفرقة وهوا ميعرفش فيها حد ولا لاعب ولا ولي أمر غير إنك تدخل علي فرقتك اللي عارفها وواخد عليها وتعرف فيها فلان وفلان فدول علي جنب هنا لأ
اشتغل من أول وجديد عندك طموح عندك دوافع عايز تحقق حاجة ليك
كلمة اخيرة للاستاذ محمد مصيلحي رئيس نادي الاتحاد السكندري
طبعا أستاذ محمد مصيلحي هوا الأب الروحي لينا هوا الداعم الأساسي لينا هوا اللي اخترنا لهذا المنصب وبيتحدي بأبناء النادي أي حد بيتكلم ويقول إن اسكندريه مفيهاش كوادر من أبناء النادي ويارب نكون أهل للثقة دي ونعمل حاجة كويسة للكيان الجميل
اضغك علي الينك لسماع الحوار صوتي https://fb.watch/ljfR1euhA7/?mibextid=Nif5oz
شكراً جزيلآ لحضرتك ونتمني لك كل توفيق ونجاح واتشرفنا باللقاء الجميل ده
انا اللي شاكر ليكم واتمني لكم مذيد من النجاح
الكابتن محمود عز رئيس قطاع الناشئين بنادي الاتحاد السكندري يفتح قلبهُ للمساء العربي
1,974 إجمالي المشاهدات
