جريدة المساء العربي جريدة المساء العربي
مجموعة مصريات
كتب / مجدي صبحى
“خليها بجميل”
كركب كركبة وأعمل المستحيل
اتشقلب شقلبة امشي الف ميل
حرتك مش هايعدل اللي تميل
الشحات زي اللى فلوسه بالزمبيل
ماتبصش للغير ترتاح وتنام الليل
اللى ليك ليك وكله بالتساهيل
أرضى وربك يبارك لك ف القليل
الرضا بيبان مش بالكلام والتمثيل
ولما يرزقك افتحها أنت سبيل
الغنى سخا مش صر في المنديل
ترضى أو تتأتأ ها يمر الليل
كدة كدة عديها وخليها بجميل
“درة الكون”
المصري بن البلد دي ما بيعرفش يخون
وبيصبر وبيتحمل ويعدي مهما يكون
وبيحب الكبير ويساعده لأجل تهون
كلنا واحد قهرنا المحن بهرنا العيون
مصر أقوي من الغلا ومن محن الكون
الحلم هايتحقق حتي لو كان مسجون
عدينا حروب وغلبنا ولاد صهيون
رغم الألم أنت يا مصر نور العيون
نتحمل وهاتفضلى بهية ودره الكون
إخترعنا الدقة وعيشنا بملح وكمون
ملوخية بمية ساقعة او حبة زتون
ياما كلنا ما بتشكرش البطون
مش استكانة صلابة وصبر ودين
هاتعدي و مفيش اسرع من السنين
ومهما الدنيا تقسي إحنا مش لينين
وهانثبت للدنيا إن إحنا مش هينين
“خفيف حملك”
وأفضل عمرى أبص ف عنيكى
هايم مشبك أيدى ف أيديكى
وفى المحن أنا جسر أعديكى
وأهديكي عمرى لاجل أفديكى
لو كلك هموم أشيل أنا همك
ما أنا مصرى يعنى أنا إبنك
مهما يتقل عليا خفيف حملك
لما كله يهرب مين يشيل عنك
مصر يا وفا ودفا وقلوب متولفة
يا لمة وضمة فى الشتا دفا
وشاي في العصارى دوا وشفا
يوم حلو ويوم مر وناسنا مولفة
“أنت الهوى”
يا مصر وأنت الهوى والعشق
بيكى انت وعشانك عشت
ودايما لحضنك قلبى يرق
فرحانة او حزينة ليك عشقت
يا شايلة من الهموم جبال
أقبل منك ومش هاسأل سؤال
يا أقوي من المحن والأهوال
يا صابرة وبدعاك يتبدل الحال
ياما كادوا بيك وغرضهم تغرقى
يا قالولك بين ولادك فرقى
يا أم الحكمة وعاوزة تترقى
يتعلموا منك الشعوب لو ترتقى
مجموعة مصريات
3,117 إجمالي المشاهدات
