جريدة المساء العربي جريدة المساء العربي
أمي الحبيبة
النميري سعيد
أمي الحبيبة
لساكي
إزيك ياماه
كيف اخبارك
وحشاني والله
نفسي اسيب الدنيا
والقلب يروق بدواكي
عاملين ايه عيال علي وياكي
لسه شقاي مقاريض
حدش منهم زارك
لسه الصحه سعفاكي
وقادره تحمي الفرن
واتخضي القربه
وتعملي سمنه
وحتة جبنه
ف قلب الشنده
لساكي قادره
اتلمي وقيد
لساكي فاكره
الغالي سعيد
وصوته العالي ينده باسمك
وضحكة وشه
والله فاكرها كنه عشية
دخلته ياما
كنها عيد
وخبطته م البوابه القبليه
وزعقته دايما
واه يا اسعاد
ياد يا وحيد
لساكي فاكره الجيره
لساكي فاكره اللمه زمان
الخاله بنوره
والجده ربيعه وفكيهه
والعمه فتحيه
وسهرايه ف وقت عصاري
وكنكة شاي
وهات يا حكاوي
ف خشم الباب
ع العتبه القبليه
لسه الجيره زي ما هيه
ولا راحت بغياب الاحباب
والخلان
وراحوا وراحت السيره
لساكي
قاعده وسارحه
ف اللي غابوا القاعدين
شجرة حزنك
دايما طارحه
تملي أنين
خمس اخوات ودعتي
الخال قاوي وعبد المودود
وسعيد
واختين غاليين
تمن اعيال
ربيتي وكبرتي وشيلتي
مشيوا وسابوا
قلب حزين
بعد اللمه وحيد
ألا قوليلي
لسه عيونك حلوه وواسعه
ولسه الضحكه
دايما طاله بعمر جديد
لساها قادره
تلضم أبره
ف قلب الضلمه
بلنضه كاروف
وتسرب غله
لسه سواعدك جامده
تعمل طوف
وتبني حيط م الدله
لساكي
عتتفرجي ع التلفزون
فاكره غوايش
ومعلي قانون
واسمعت.. امحمد ولدك
قال دابلك تلفون
عتعرفي فيه
ولا كرهاه المحزون
أقولك ياماه
والله نفسي ف حبة فايش
او حتى رغيف بايش
وشوية كمون
زهقت من أكل الفينو
وحاجات بيقولوا عليها
الأسكندرانيه ساليزون
عايز ياماه حبة جبنه
ورطلين سمنه
واشوية ملوخيه ناشفين
وجايلك ع العيد
ومعايا امحمد ومسعود
ووحيد
لساكي
أمي الحبيبة
1,354 إجمالي المشاهدات
